O Ribeiro
O Ribeiro é dende sempre unha das rexións produtoras de viño por excelencia en Galicia, na confluencia das cuncas dos ríos Miño, Avia, Arnoia e Barbantiño. Nos últimos anos, O Ribeiro tamén destaca por seren unha das grandes zonas produtoras de aceite de oliva de Galicia.
Ademais, o patrimonio artístico do Ribeiro é un dos seus meirandes atractivos, un territorio que goza dunha riqueza paisaxística excepcional e presenta algunhas das manifestacións da arquitectura máis representativa de Galicia.
Cando veñas ó Ribeiro, aproveita para visitar as súas vellas cidades medievais, como a impresionante xudería de Ribadavia, participa nas súas festas máis emblemáticas, como a Festa da Istoria durante o mes de agosto, ou desfruta das súas magníficas augas termais.
O Ribeiro é unha terra excepcional que paga a pena visitar e que che ofrecerá a cambio un produto único, aceite e viño do Ribeiro, produtos da máis alta calidade, como nos aseguran as cantigas populares:
Se te casas en Ourense,
pídelle a proba primeiro.
(bis)
A cacheiriña do porco
e o bo viño do Ribeiro.
(bis)
Se vas ó Ribeiro, ó Ribeiro d'Avia,
se vas ó Ribeiro, vai por Ribadavia.
Vai por Ribadavia, vai por Ventosela,
que che hai unhas nenas que da gusto velas.
Que da gusto velas, da mágoa olvidalas,
se vas ó Ribeiro, vai por Ribadavia.
